कमलाको पूर्बी तटबन्ध कटान

सिराहा । धनुषा र सिरहाको बीच भएर बग्ने कमला नदीले पूर्वी बाँध (तटबन्ध) कटान सुरु गरेको छ । सिरहा तर्फबाट बनाइएको पूर्वी बाँध कटान गरिरहेको छ । नदीमा पानीको बहाब कम नभएको र सिरहा तीरबाट बनाएको बाँध कटान सुरु गरेपछि सो क्षेत्रका बासिन्दा त्रसित बनेका छन् ।

सिरहाको बसपिट्टा गाउँ नजिकैको तटबन्ध कटान सुरु गरेपछि गाउँ नै डुबाउने खतरा बढेको स्थानीय बासिन्दा दिनेश यादबले जनाए । उनले बाँध कटान रोक्न स्थानीय प्रशासनले आवश्यक कदम चाल्नुपर्ने देखिएको बताए ।

बाँध कटान हुन नदिन बनाएको स्परहरु समेत कमला नदीको बाढीले हल्लाइरहेको छ । तारभित्र ढुंगा हालेर बनाएको स्पर तलको माटो बाढीले बगाएपछि स्परपनि बगाउने खतरा बढेकोछ । ‘स्परहरु बगायो भने बाँध भत्किने खतरा बढ्छ’ उनले भने– बाँध भत्कियो भने बसपिट्टा, मल्हनिया गम्हरिया, माडर, रमौल र सिरहा सदरमुकामका करिब १० हजार बढी घर डुबानमा पर्नेछ ।

सिरहाका प्रमुख जिल्ला अधिकारी श्रीकृष्ण श्रेष्ठले बाँध कटान हुन नदिन नेपाली सेना र प्रहरी खटिसकेको जनाए । जल उत्पन्न प्रकोप नियन्त्रण डिभिजन कार्यालय जनकपुरले बाँध कटान गरिरहेको ठाउँमा बोरा हालेर बचाउने काम सुरु गरेको उनले बताए ।